CERITA RAKYAT KARO "SARINDU TUBUH"
BAGIAN - 2
Mentas Anakoda Perlajar. “Asakai ergana kerbota e?” nina Anakoda
Perlajar. “Aku, ergana pe la ku eteh”, nina Anak Melumang. “utang ngembari
ngenca ajangku”, nina.
“Asakai ulihndu ngembari?” nina. “Gadung sempenggel nge
erpagi-pagi, gadung sempenggel nge rebi-rebi”, nina. “Di bage, raslah kita
ngkahe”, nina Anakoda, “e sambar gonjendu” nina, “sambar bulangndu, sambar
bajundu”, nina, “sambar cabindu”, nina. Ngkahe Anak Melumang, i bereken Anakoda
belanjana duwa ratus. Seh empat bulan enggo dat uwalah ratus. “ras kita sekali
nangkeng agi”, nina Anakoda, “Ngelegi kerbo, babanta ngepar. “Kam me gelah lebe
nangkeng kaka”. Nina Anak Melumang. “Enggo ku tukur tabung duwa me, enggo ku
jarumi baju duwa, bereken man turangta i gugung, turangta Sarindu Tubuh”.
“Sarindu Tubuh la ku eteh”, nina Anakoda. “Bagelah nindu pagi i gugung”, nina.
Nangkeng me Anakoda Perlajar. Seh i gugung me Anakoda Perlajar,
tengahna juma takan-takan. Naka-naka sarindu Tubuh, mentas Anakoda Perlajar.
“Lawes kujange kam enda mama,” nina Sarindu Tubuh, “Ija Sarindu Tubuh bibi,”
nina Anakoda Perlajar, “Man kadendu Sarindu Tubuh,” nina Sarindu Tubuh. “Enda
tenah turangna” nina Anakoda Perlajar, “ Baju duwa, tabung duwa.” Ija gundari
Anak Melumang?” nina Sarindu Tubuh, “Taruhken kal kami kuje,” nina. “de atendu
jadi, enggom giya lang” nina Sarindu Tubuh, “sada pagi kami mere biyangndu,
sada kami si ngelegi pola man inemendu.”, “sekali nari kami ras nangkeng” nina
Anakoda Perlajar.
“Di bage kepe kaka, kaka ningku kata kam, duwa kam turang dilaki,
duwa kami turang turang diberu, enda amak duwa, enda kampil duwa, enda uwis
duwa, ternonggal kam ras Anak Melumang.”
Seh me i jahe Anakoda Perlajar. “Enda tenah turangta,” nina kata
Anak Melumang, “amak duwa, kampil duwa, owis duwa”, tangis Anak Melumang. “Ras
me italah nangkeng,” nina Anak Melumang. Seh me iya i gugung i pempo Anakoda
Perlajar, Anak Melumang. I empowina Sarindu Tubuh. Sintuwa ndube ku kepultaken,
singuda ku kesunduten, Anak Melumang itengah.
Tande me duwa tahun, tubuh me anak oe nini, anak dilaki ni
kepultaken, anak dilaki nge i kesunduten, anak diberu itengah.
Nibelin anak raja i kepultaken. “Si kai gelarku nande?” nina. “mamandu
nggelar kam, bapa” nina nadena. “Enta ku tenun lebe cabin mamandu,” nina, “Ku
tenun sada tudung mamindu.” Nina, “ku bayu sada kampil mamandu, ku bayu sada
kampil mamindu.” Enggo me dung kampil i bayu, enggom dung uwis i tenun, e
dahina mamana ku ketengahen. “Enda sada mama man cabindu” nina, “bereken sada
man tudung mami.” Nina, “enda sada man kampilndu, bereken sada man kampil
mami,” nina.
“ku tandai pe kam so pe,” nina Anak Melumang. “Duwa kune ndube
nande diberu, sada kam nge ndube dilaki” nina, “bibi singuda ndube ku
kesunduten, nande i kepultaken, Bapangku Anakoda Perlajar, nandeku Sarindu
Tubuh”, “aku nge pinter nggelar kam bapa,” nina Anak Melumang. “Enta ku tepa
lebe pisondu” nina, “Gelarndu si Raja Bulan” nina, “si Raja Bulan Malela” nina.
Reh me raja kesunduten, nina. “Enda sada man cabindu mama” nina,
“bereken sada tudung mami” nina. “enda sada kampilndu mama,” nina, “bereken
sada man kampil mami” nina. “Ku tandai pe kam so pe,” nina Anak Melumang. “duwa
kune ndube nande diberu” nina, “sada kam nge dilaki,” nina. “Bibi sintuwa ndube
ku kepultaken, nande i kesunduten, bapangku Anakoda Perlajar, nandeku Sarindu
Tubuh.”
Tangis Anak Melumang. “aku nge pinter nggelar kam bapa” nina, “ku
bahan lebe kulcapindu” nina, “gelar kulcapi si ulung-ulung” nina, “ulung-ulung
parang mbelin, ulung-ulung anak perana, ulung-ulung sintuwa-sintuwa” nina,
“ulung-ulung singuda-nguda” nina, “ulung-ulung danak-danak, gelarndu si Raja
Perkulcapi.”
Mulih ku kepultaken Raja Kepultaken, mulih ku kesunduten Raja
Kesunduten.
Mbelin anak raja ketengahen. “Si kai gelarku nande” nina anak Raja
Ketengahen. “Pelajari mbayu ame” nina. “i bayu kampil bibindu” nina, “i
pelajari ertenun ame,” nina, “i tenun uwis bengkilandu” nina.
Bersambung
Bagian 3
Bagian 3
0 komentar:
Posting Komentar