Cerita Rakyat Karo " DUNDA KATEKUTAN " Bagian 1

CERITA RAKYAT KARO " DUNDA KATEKUTAN "

BAGIAN - 1

E lit me ndube turin-turin guru, guru Pakpak Pertandang, pitu iya sidalinen, erciken-ciken tungkat na mangalekat, ersungting-suntingken perminaken ambat tuwah na bolon, erkadang-kadangken pustaka na jati. Tandang miya ndube ku taneh Tuding si nu Purba i taneh Pulo Cimcimen nari. E kundul miya ndube i teruh sapo sendi gading, ercakap-cakap meiya ndube. “Adi ku beligai uwari telu puluh, ku tiktik desa uwaluh, ku oge mamis si lima, katika si telu, di raja nta taneh sahaluren enda, Tuding si nu Purba enda, mbuwe nge min jenda lembu man arak-araken, mbuwe kuda man panjangen, mbuwe nge kerbo man tenggalanken, mbuwe nge emas i buniken, mbuwe nakan pe man pangan, si man me ku idah kurang, si meligai emas me ku idah kurang, si ngarak-ngarak lembu, si nenggalaken kerbo ku idah lang, si manjangi kuda-kuda ijenda lang.

E megi-megi permakan kambing. Lompat permakan kambing ku rumah, i atakenna man kemberahen, “O kemberahen! Adah kuidah guru i teruh sapo gading”.

E serseri kemberahen kampil, kampil tumba, i dahi kemberahen ku teruh, i kapurina belo pitu ngkebabah. “Di enggo man belo gurunami, man kita ku rumah, enggo nakan kusumpitken, enggo pola ku kitangken. E man me guru ku rumah.

Enggo besur man, besur minem, i kapuri kemberahen ka belo pitu ngkebabah. “aku enda kemberahen” nina,
“belo si kapuri enda, lit kuakap ukurndu”, nina Guru
“lit nge tuhu gurunami, reh meateku gurunami, lebe giya min aku ersingkih maka erdakan, lebe giya min aku njarumi maka ruwis, e maka si bahan ambat tuwah nateku gurunami. Kai deba pulungen gurunami?” nina Kemberahen.

“I buwat tungkap terulang kemberahen, i buwat balbal terulang, i buwat lalu terulang” nina Guru.
“E enggom pulung gurunami” nina kemberahen.

“E i semeken empat berngi” nina guru.

Enggo ertubis buluh tungkap terulang, enggo erdahan lalu terulang, erbulung balbal terulang.

“E banci me kuakap i bahan ambat tuwah gurunami”, nina kemberahen.

“Ai si bahan ka penguji-ngujin sekali nari kemberahen” nina Guru.
“Si cuba si ulak lubang kurung si tukatuka, di si rutu nge denggo isina ibas, la nai padah bahan pengujin tole, adi si ilik nge kari isina ibas, i bahan ka nge ujin tole” nina Guru.

E cubam i ulak lubang kurung si tuka-tuka alu tungkat na mangalekat, si rutu nge tuhu isina ibas, e pepulung me pulung-pulengen bulung-bulung tawar seratus duwa puluh, e i giling jadi tawar, tawar ambat tuwah na bolon. E enggo dung tawar i giling, “mulih me aku”, nina guru.

“Seh pagi setahun kedabuhen pagi tuwah kemberahen ku tadingken, e maka bekas kata kinigurun guru Pakpak Pertandang Pitu Sedalanen, erciken-ciken tungkat na mangalekat, ersunting-suntingken perminaken ambat tuwah na bolon, erkadang-kadangken pustaka na jati, bagelah pagi natendu kemberahen. Di seh me pagi duwa tahun, tande pagi telu tahun, a min kedabuhen tuwah pe pagi kemberahen, si e me bekas guru Pakpak Pertandang natendu pagi kemberahen!” nina Guru.

E tandem setahun, kedabuhen tuwah kemberahen e, lit me sora erjaga i datas bungbungen tengah berngi si mbages.

E i begiken me sora erjaga-jaga i datas bungbungen, me sora erjaga-jaga. E i begiken me arah ture kenjahe, arah ture kenjulu sora erjaga-jaga, i begiken me sora arah ture kenjulu, arah ture kenjahe sora erjaga. E i begiken ka mulih ku rumah, idas bungbungen sora erjaga-jaga.
“Pantek pantangenku sendi gading pitu n tingkat bilang-bilangen, i palu gendang pitu bangunen, i pantem lembu pitu, i buwat nakan duwa pulu empat garuwen, i buwat pola duwapulu empat kandi-kandi, i pepulung raja si erdemu orat nu jaba, si pesanggeh ruhi nu page”.

Bersambung
Bagian 2

Share on Google Plus

About Kalak Karo

This is a short description in the author block about the author. You edit it by entering text in the "Biographical Info" field in the user admin panel.