CERITA RAKYAT KARO " DUNDA KATEKUTAN "
BAGIAN - 2
E enggo pulung kerina, dusun pe kerina.
“E terang uwari pepagi”, nina kata tuwa-tuwa (lit tuwa-tuwa sada,
la nai kesali ku ture pe), “aku pepagi ku nangkih pantangen” nina.
“E di pepagi mehuli akap kam nangkih pangtangen, pepagilah” nina.
“E katawari ku nangkiih?” nina anak raja. “Nangkih bapa, di
nangkih kam, pantek ciger kal matawari”, nina. E ciger matawari, enggo lit uwis
pitu lambar kirah, lit amak pitu lambar datas, lit rimo pitu sentangke nina. E
sora erjaga-jaga lit me gelgel ibas pantangen, jelma la idah. E tande empat
berngi nina. E tubuh me danak-danak nge. Tubuh me danak-danak, sada dilaki,
sada diberu, biyang pitu, nipe sada. E merusrus langit, mesuwak me papan,
mecepik palas, metembuk taneh. E legina guru Pakpak Pertandang ku taneh Pulo
Cimcimen. E seh me guru. “Kai kesikel kemberahen?” bagem nina guru. “Kai pe
seya gurunami. Ngoge uwari danak-danak tubuh” nina Kemberahen. “ Enggo aku
kemberahen, ku beligai uwari telu puluh, ku tiktik desa uwaluh, ku oge mamis si
lima, katika si telu, si angkup-angkup. Anak si dilaki pagi lampas i pe empo,
anak si diberu lampas i serehken, em kata uwari ku oge kemberahen, aku mulih
nge aku” nina Guru, “Ngulihi amangku, inangku ku taneh Pulo Cimcimen”.
E mulih me guru.
Tande sepulu duwa tahun, bagi si ni etehna si jile si diberu si
dilaki.
E lawes me si diberu nutu page ku lesung e ngikut-ngikut nge si
dilaki, lawes me sidiberu nutu page ku lesung e ngikut-ngikut nge si dilaki,
lawes me si diberu njujung kuran ku lau, ngikut-ngikut nge si dilaki ku lau.
Amin mbuwe diberu i taneh Purba, sada turangna ndai i akapna diberu, si diberu
pe bage, mbuwe dilaki i taneh Purba, sada turangna i akapna maka dilaki.
E lawes me erburu si dilaki, ngikut-ngikut si diberu. “ula ikutken
kam turangndu erburu ame”, nina kemberahen, “sumbang me pagi, lego denggo
uwari” nina kemberahen, “mate denggo sinuwan, muwas melehe denggo lembu, muwas
melehe denggo kerbo, muwas melehe denggo jelma kerina, mbeltang denggo taneh,
melakar me denggo kerangen i taneh Purba enda ame!”.
E susur dilaki arah ture kenjahe, susur diberu arah ture kenjulu.
E lego kune uwari pitu tahun, pitu tula. E muwas melehe lembu, muwas melehe
kerbo, muwas melehe me jelma.
E salih jelma jadi mawas, salih me lembu jadi belkih, salih me
kerbo jadi gajah, salih me kuda jadi badak, salih me babi jadi uwili.
Salih me manuk jadi mbulayan, salih me page jadi sesa, salih me
jaung jadi beski, salih me belo pe jadi gambang.
E lawes me iya erburu bernawit simbulan i perburukenna biyang si
pitu. E ngikut me nipe si mangambus. E jumpa me iya ras kayu tenggolan i
kerangen Limbur Raja, nangkih bernawit, e nangkih me biyang, nangkih nipe,
nangkih me iya dilaki diberu. “enggo ah maina” nina jelma si Begu, si
ngiyani-ngiyani kayu tenggolan, “aku ndekah me jenda ku timai idas kayu
tenggolan enda”, nina. “menci pe la lit enggo nggarang arah teruhku, kuliki pe
la kabang arah bobo ku, enda reh jukut mbelin man pangan”, nina Jelma Si Begu.
Bersambung
Bagian 3
0 komentar:
Posting Komentar