Cerita Rakyat Karo " DUNDA KATEKUTAN " Bagian 5

CERITA RAKYAT KARO " DUNDA KATEKUTAN "

BAGIAN - 5

“Kai kesikel kemberahen?” bagem nina guru.

“Kai pe seya gurunami. Anak si dilaki si diberu si ni oge kam uwarina ndube, idah kam, di anak si dilaki ndube minter ndube mambur perdalinna, beritana mate pe la lit, beritana nggeluh pe lang. Bagem!, lah nggeluh anak si diberu e nateku. Di lit anak diberu lit nge anak dilaki nateku. Eme ku serehken gurunami. Enggo reh anak dilaki ndai. Enggo iya lawes ras kela, nina jadi gutul-gutul kayu tenggolan i tengah kerangen Limbur Raja.” Nina kemberahen.
“Em kap kata uawari ku oge ndube” nina guru.

“Anak ndu si dilaki kela nindu. E ndube pe, lampas kal nge serehken anak si diberu ningku, lampas kal i pempo anak si dilaki ningku, kata ngku la i pake kam kemberahen. Enggo di gunana denga kin i akap kam, i baba pe banci nge iya ku rumah” nina Guru.

“Anakndu si dilaki ercakap kam pelepar dingding. Di pencarinna pagi, sada uwari iya pagi erlanja, lit nge serpi man alonkenndu, lit nge pagi sira, lit nge pagi belo, lit nge pagi gamber, lit nge pagi mbako. Anakndu si diberu e, erpagi-pagi i benakenna mbayu, karaben dorek me nayangisa, di sumpit pagi bayuna, erpagi-pagi benaina, karaben dorek me ngisisa, di nutu iya pagi, sada berngi iya nutu dung beras telu tumba, sada berngi iya pagi erserka, dung me benang teluh puluh. Di gunana kin bage i akap kam kemberahen, banci si legi ku kerangen”, nina Guru.

“Aku la nai ku akap gunana min gurunami. Anakku si diberu man kandu-kandu ngku nutu ku lesung, man teman-temanku njujung kuran ku lau, man aronku ku juma nateku. Anak sidilaki e, di ben uwari, kudilo i umpe-umpe ture, reh iya ku rumah, ku kimbangi anak mbentar, ku ukat nakanna nateku, ku dudurken perburihenna, di enggo iya elah man, ku kapuri belo panganna nateku” nina kemberahen.

“Enggo, di bage kepe natendu kemberahen, aku la nai ngasup aku, e mulih me aku, ngulihi amangku, inangku ku taneh Pulo Cimcimen.” Nina Guru.
“Ola kam lebe mulih gurunami, di bage nari kin ngenca banci natendu, bagemlah giya legi ku rumah, kela ngku ndai ras anakku ndai”, nina Kemberahen.
“seya kelandu, anakndu e kemberahen, bagem kap ningku” nina Guru.

“di e, e legi ku rumah gurunami” nina kemberahen.

“E buwat kampil mbelin, buwat uwis tudung-tudung, buwat benang teng, mbumbun sangkep erpulung, i buwat amak selembar, lawes kita ku kerangen” nina Guru.

E, seh i kerangen, jumpa ras kayu tenggolan, i antari kayu nina. I oge empakna, mehuli empak kayi i keret sibar gedang, i tadingken mbumbun ibas benana. I balut kayu ku rumah. Seh i rumah i pengkah jadi gana nina. E enggo dung i pengkah nina.
“Di lit manuk kemberahen, i geleh manuk, megara, i buwat atena, i buwat erakna, i buwat pusuhna, i buwat bahing, buwat sira kibul, i buwat lacina. Em gelarna dalang-dalangen, em i bereken i panna, i buwat pola tulak purba jati, jatiken kita ertuwah bayak. I bere minem iya alu ikur kitang.” Nina guru.

“engoo, enda kemberahen, anakndu si dilaki enda, em gelarna si Tuwan Aji Dunda Katekutan, anakndu si diberu enda si Beru Puwang Tampe Raja Benewasen, nterem kap kakandu, enterem agindu, nterem anak berundu, nterem nge seninandu, enterem ginemgemndu. Apai kal pagi nipindu gulut, apai kal pagi entah lit bahan-bahanen nu kalak, anakndu si dilaki enda tuhu ngulakken bahan-bahanen nu kalak, entah lit pagi mesengget burawan, anakndu si diberu e pagi tuhu man peraleng tendi” nina Guru Pakpak Pertandang Pitu si dalinen, si erciken-ciken tongkat mangalekat, si ersunting-suntingken perminaken ambat tuwah na bolon, si erkadang-kadangken pustaka na jati.

-= TAMAT =-

Share on Google Plus

About Kalak Karo

This is a short description in the author block about the author. You edit it by entering text in the "Biographical Info" field in the user admin panel.