CERITA RAKYAT KARO " SI LAGA MAN "
BAGIAN - 5
Sangana terang uwari, arih-arih ka iya kerina.
“Lawes kita ku juma, gelah kita ercakap”. Ndarat si Laga Man, “Ku
juma kena kerina, barang-barang la benci bene”, nina si Laga Man. E maka ku juma
kerina nongkati lada, si Lada Man i sapo tading.
Tande sebulan, mengelngel akapna, di lawes iya mbiyar iya bene
barang.
“Ma bage teman kerina. I bahan sekalak man tading i sapo”. “Bage
pe mehuli”,nina kerina.
E maka i bahanna sada pengulu dagang.
“Ma tertahan aku kundul-kundul i jenda. Lawes kami, reh kah” nina
si Laga Man. I suwanna kuning i duru sapo, kacang sengkebenna.
“Enggo ku suwan sinuwan-sinuwan enda i duru sapota. Di melus pagi,
bangger me silih atendu, lawes kam duwa, telu kalak ngedahi aku”.
E maka lawes iya teluna erdalin kompak matawari ben. Setengah uwari
jumpa iya sada kuta. Enggo melenget kesain. Maka nungkir ibas benteng nari
diberu sekalak, nina “ola erdalin-dalin kam ibas kesain. I janari kam ndai?”
“Ajangku la nai ernentu bibi” nina si Laga Man. “Di ma nai ernande”.
“Di mesikel kam ijenda, banci. Ola kam erdalin-dalin ibas kesain e, lit merawa
manuk si gurdi-gurdi”, nina diberu.
“labo aku mbiar bibi, mate, em totonku, la mbera nina pengindoku”,
nina si Laga Man.
“La pe mbera nina pengindoku nindu, mbuwe kalak mate ibas kuta
enda, enggo keri i pan manuk si Gurdi-Gurdi. Ma idah kam enggo melungen kuta
enda?” nina Diberu.
“Ije labo aku mbiyar”, nina si Laga Man. “Terbunuh kam manuk si
Gurdi-Gurdi enggo kam salih jadi raja ibas kuta enda, enggo i keriken manuk si
Gurdi-Gurdi turang kami”, nina Diberu. “Banci ku bunuh”, nina si Laga Man.
“Mari, kubas kam, talangi pintun enda, ola melawen, reh ka iya,
idahna kita, mate kita”, nina Diberu.
“E banci kubas”, nina si Laga Man. I talangina, kubas teluna, i
tutupna ka.
Ercakap iya kerina, pitu kalak.
“Kuga belinna manuk si Gurdi-Gurdi e bibi?”, nina si Laga Man. “E
mbelin mama!, lit kabengna sidepa sembelah belangna, em belinna”, nina Diberu.
“E ngenca ngkeriken jelma ibas kuta enda?”
“Uwe mam!”
Ben uwari, i asabna, si Laga Man pedang si bulung galuh. E maka i
turapna pedang ndube alu cimpa. I tadingkenna si Buluh Sungsang ras si
Pengeltep ibas kubun ras diberu ndai, ndarat si Laga Man nimai si Gurdi-Gurdi
ibas kesain.
Idahna sirang duwa puluh depa nari ngkiyap si Gurdi-Gurdi.
“E manuk ndai” ate si Laga Man. I rintakna pisona, e maka i
kesahina, jekjek ibas kesain.
Nangkis jelma manuk si Gurdi-Gurdi. I tangkisna, takil si Laga
Man. Tamburi kabengna sada enggo si Laga Man, tambur, terketes.
Bersambung
Bagian 6
0 komentar:
Posting Komentar