CERITA RAKYAT KARO " SI LAGA MAN "
BAGIAN - 3
“O, bapa!” nina, “ija ku bahan batu enda ndai?”, “ijem” nina
bapana. E maka i benterkenna ibas tengah kesain. Enggo kena sada sapo, i tindih
batu si mbelin, enggo mehuli batu ndai man perkundul-kundulen jelma kerina.
E maka mbiyar ka bapana ras bengkilana i rumah, idahna batu ndai
enggo i baba si Laga Man ku rumah.
“kuga perarihta ndilosa ku rumah e silih?” nina bapa.
“Ula nai mbiyar, mbiyar kita tentu i bunuhna kita, batu ndai si
galang i babana” nina silihna. Maka la nai mbiar bapana, mate, mate lah atena.
Lawes ia kuteruh, ndilo si Laga Man. Nina si Laga Man, “ iyani
kambing ndai nina bengkila ibas berneh, merudang aku nina bengkila, tapi ngkuruk
batu si galang ndai idas uruk, munuh aku ate kena kerina, ras bengkila, bapa,
bibi, ras nande. Di munuh aku nuwate, ma bage, arih-arih kitalah kerina ras
bapa, ras nande ras bengkila, ras turangku kerina. Buwatlah nande! Man bangku
bunga bunga pitu lambar, utang bibi cimpa pitu mukul, bengkila rutang
bulang-bulang selambar, turangku rutang kampil selambar, bapa rutang piso sada,
mama pementing sada”.
E maka i berekenna kerina.
Ma dage bage, bapangku, nande, bengkila, bibi kerina, ena kam
turangku kerina sayep-sayep, mela kal ukurndu ngenehen aku, gelah aku lawes,
ola ersayep, ras kita giya ate, di nakan si ben la ne terbuat?, di bage bage me
kam kerina, endam aku berkat, ola aku erbangger-bangger”, bage katana si Laga
Man.
Maka idas batu si galang ndai i tepukna, lawes iya.
Maka lawes iya niyar-niyar ibas tengah kerangen Limbu raja.
E maka jumpa iya ras si Pengeltep Si Mate Begu. “ise e?”, nina si
Pengeltep. “Aku”, nina si Laga Man. “sendah aku jumpam jukut raja”, nina si
Pengeltep. “e toton maka jelma erniyar-niyar pe” nina si Laga Man.
E i eltep si Pengeltep si Laga Man.
“Buwang siya! Man kai e eltepen aku, kena pe labo i panna”, nina
si Laga Man, “ e maka ola kam niyar-niyar ibas tengah kerangen Limbur e”.
“Kai biyarku!” nina si Pengeltep. “Tuhu la ko mbiyar ?” nina si
Laga Man.
“Tuhu” nina si Pengeltep.
Maka i ayaki si Laga Man, tipakna, mestak i tengah awing-awang si
Pengeltep, e maka ndabuh se hi teruh nge terketes.
I buwat si Laga Man bunga-bunga ndube sitik, cimpa sincircir, enda
i tamana i babah si Pengeltep, minter iya nggeluh. Nina si Pengeltep “Nembah
aku bandu, ola aku i bunuh kam, si embah-embah kampilndu aku gia”.
“Em katangku ndai, mintes ko merawa ngenehen aku, bujur katangku
man bam”, nina si Laga Man. E maka ras iya erdalin. I tempi si Pengeltep kampil
si Laga Man. Duwa dalinni ras, siyar-siyar kerina Limbu raja, iya duwana.
Bersambung
Bagian 4
0 komentar:
Posting Komentar