CERITA RAKYAT KARO "SARINDU TUBUH"
BAGIAN - 5
Beliden sitik pagi burawan, i tandangi ku urukuruk,
erpantar-pantar, ranjap-anjap,erbertuk empat, erlambe sarsar, ercimpa rambe-rambe,
ergule-gulen, er tuwalah mumbang, ermanuk mbulan. Ergana gedang,
erpisilih-silihi cur-cur, pola binerkat, galuh binerkat, besti tinampul silandongawan,
siyang sirungkas, ungkasken banga kelesa, ertukuk-tukuk, ertambe-tambe,
ertangkal, ermanuk piyak. I cukupi ka peraleng tendi ku rumah nini begu deleng,
naruhken tendi si enggo burawan, i ogena mayang si lajaren, ngelajari tendi si
enggo burawan, i ogena, i ogena tuwalah mumbang surega, i nehen-nehen tendi i
rumah, i ogena galuh tingkel-tingkelen, ertingkel tendi i rumah ras anak
dilaki, ras anak diberu nterem, ertingkel kinibayak-kinituwah mbue, i ogena
cimpa lepat-lepaten, lepat tend ii rumah, ikan i kelajar nari, ngelajari tendi
si enggo burawan, sira i kerijahen nari, meriyah ate tendi i rumah, i ogena
tinaruh pe manuk raja muliya, ermuliya tendi i rumah, piya pe runggu, lasuna pe
runggu perunggu-runggu tendi i rumah ras anak dilaki diberu nterem ras anak
beru senina nterem numpak-numpak kalimbubu mehuli, simata pe runte-runten,
gelarna kurungen manic kurung tendi i rumah. I oge baka-baka, baka nasi,
ngasiken anak dilaki diberu nterem, ngasiken kinibayak kinituwah mbue, baka ndu
ertudung-tudungken uwis arinteneng, teneng tendi i rumah, erbulang-bulangken
benang teng, peteng bana tendi i rumah, beligai rudang-rudangndu, rudang
sepulusa gelarna, persada tendi ku rumah, gelarna rudang-rudangndu, tandeh
erbuwah, simbera bayak jaka ertuwah mingen bayak, e gelarna rudang rudangndu,
cinta-cinta sari ndapet, beras-beras, padang teguh, piso perenggi, penabah
galuh, sada ku pinta, kerina dapet, jaka mekeras ningen mateguh gundari enda ku
rumah tendi.
Terang uwari pepagi mukul tinaruh. Gelarna rudang rudangndu:
jabi-jabi rumindang, beringen tumbuh jati uratna pe terus pertibi, langgamena
sikunca benih, bulungna pe telumtum, buwahna erdagul-dagul, ngembus pe angin i
barat nari, i timur nari, i jawi nari se mbera ketartaren bulung, la mbera
kedabuhen dango, la mbera lapat, la mbera giling, la mbera metembak so mbera
meriren, bage salindungen ku rumah. Maka i uweken, uwe me ningku nindu, nina
tendindu uwe kang, tendindu si tumpak tare, nare-nare anak dilaki diberu, i
petare-tare beru senina, i tumpak-tumpak kalimbubu mehuli. Em tandingenna
salindungen ku rumah, tanding-tandingen salindungen ku rumah bagi galuh sitabar
ibas berneh-berneh, uratna pe man tepung tawar, laklakna pe man pengarkari,
bulungna lape-lape tendi, buwahna mecapet sitik mulana, meketket tingtang
tengahna, reh tebuna pengenggowina, i kelewati anakna indungna, bagi si lanai
ketandan indungna ras anakna, em tandingenna salindungen ku rumah man uwenken
nina nini begu deleng.
Pukulen guru siwah tumba beras, utangna enem ringget, dagangen
sada, amak sada, nangtang uwis sibas dagingna man sinayona man guruna. Sai me
utangna, ganci idona, sai mara, ku rumah tendi.
“beliden sitik pagi burawan e mbu-mbun sangkep merpulung,
persilih-silihi pe cur-cur, pola binerkat, galuh binerkat, beski tinampul
silando ngawan, siyang-siyang sirungkas, tungkas banga kelesa. Erpantar-pantar,
ranjap-anjap, erbertuk empat, erlambe sarsar, ercimpa rambe, ergule-gulen,
ertuwalah mumbang ka, ermanuk mbulan, ergana gedang, ergana galuh, ertenggiyang
begu, eitambe-tambe, tangkal-tangkal, ermanuk piyak-piyak, ercibal rudang
mehalep, ipasang bedil sepulusada kali. Silekanna situmba sira ka man guruna,
pukulenna berasna sepulusada, utangna sepuluduwa, dagangen sada, amak ka sada,
mereken sinayo idas iteruh, sai utangna, ganci idona, sai mara, ku rumah
tendi.”
“Beliden sitik ka burawanna, e tandangi ku uruk meganjang, i palu
gendang, i embus sarune, i buwat gui, e pitu, i bereken amak pitu lambar,
benang pitu sangkilen, e ergana nterem, ertengiyang begu, galuh erbuwah,
erndulpak nina ergana ndapdap, ercimpa ganun. Bahan ka nge persilihi cur-cur,
pola binerkat, galuh binerkat, beski tinampul silando ngawan, siyang si
rungkas, tungkas bangan kelesa, ercibal rudang mehalep, erkejeren pitu sundut,
utangna lima pulu kurang duwa, sira empat tumba persilekanna, nantang ka sinayo
idas i teruh, dagangen piton lambar. Em utang man guru, maka sai utang ganci
ido, sai mara, ku rumah tendi, mulih nini begu deleng.
“enggo dung tenahke bibi” nina si Beru Dayang Minta Raja.
“daram-darami tabu gumbang, asakken aku kubas, maka lampas aku
jumpa ras anakndu, anak si Raja Perkulcapi”.
Asekken me iya kubas. Ombakken ku tengah lawit. Mombang-mombang me
tabu gumbang, mombang ku kepultaken.
Sangkut me iya i kerangen Raja Merare. Ngelar belat si Raja Bulan,
dongkel-dongkel tabu gumbang. I kuwisken si Raja Bulan tabu gumbang. I
kuwiskenna reh dongkelna. I taka si Raja Bulan, si tabu gumbang. Ndarat si Beru
Dayang. Cirem si Raja Bulan. Si arak-araken iya ku rumah i ulihina amak
dahuhenna.
0 komentar:
Posting Komentar