Cerita Rakyat Karo " DUNDA KATEKUTAN " Bagian 3

CERITA RAKYAT KARO " DUNDA KATEKUTAN "

BAGIAN - 3

“Aku pe, i pan aku sendah nateku bibi!” nina si dilaki. “Tuhu-tuhu maka aku i pan nateku, la nai ku akap lit ingan i kegeluhen, lebe ndube aku ngidah uwari terang, terang nge ndube pengidah bapangku, terang nge ndube pengidah nande, terang pengidah anak beruna, terang pengidah seninana” nina si dilaki.

“Enggo aku ngidah uwari terang, uwari maka terang, de pengidah nandeku gelap, pengidah bapangku gelap, pengidah anak beruna pe gelap, pengidah senina pe gelap. Turin-turinna maka bage ningku” nina si dilaki. “Lebe aku ndube ngidah uwari terang lit nge lembu i arak-arakna, lit nge kuda i panjangina, lit nge kerbo i tenggalakenna, lit ng emas i bunikenna, mbuwah nge page i cameti nande, erbuwah nge jaung i suwanna, merih nge manuk i asuhi nande, mbuwe nge babi i berena. Di enggo aku ngidah uwari terang papan pe ndubem mesuwak, palas pe mecepik, taneh pe metembuk, langit pe merusrus, lembu pe salih jadi belkih, kerbo si man tenggalenken ndube salih jadi gajah, kuda si ni panjangina ndube salih jadi badak, kambing i permakanna salih jadi baluwa, a nem babi si ni bere nande pe salih jadi uwili, manuk si ni bere pe salih jadi mbulayan, page si ni suwan salih jadi sesa, jaung si ni suwanna salih jadi beski, ginemgemna pe salih jadi mawas, em dalinna, kite-kitena maka i pan kal nge aku sendah nateku”, nina sidilaki.

“Enggo di bage kin kepeken mama, ras me gelah kita ngiyani-ngiyani kayu tenggolan enda, suruh gelah nipe enda mulih, diberu ena pe suruh ras biyang ena, kita me lah duwa-duwa ngiyani kayu tenggolan enda, man bandu aku la ertukur nateku. La me jenda matah nakan man pangan, la me kurang pola man inemen, la kurang gulen man pangan, la me kurang uwis man baban” nina jelma si Begu.

Mulih ku rumah diberu ras biyang, ras nipe.

E tande empat berngi, matah me nakan man pangan, kurang me pola man inemen, matah me gulen man pangan, kurang me uwis man baban.

“E aku lawes me aku lebe” nina anak raja sahaluren Tuding si nu Purba. “Di aku enggo kin pengindoku kin, kata ertak dagingku kin ndube, kata tubuhku mge ndube, kam pe ku tawin, la nai man, la nai minem, la nai ruwis”, nina anak raja sahaluren Tuding si nu Purba.

“Ah e ola kam lawes” nina jelma si Begu. “Di nakan kurang man pangan nge, dahi nini nta, ikut-ikut lau e kolu-kolu, jumpa kam ras nini nta anak Tarigan mergana, Raja Pustima, Datuk Rumbiya Gande, perpeken-peken salah ukum, perbelo tandang sinuwan.

E lawes nge anak raja sahaluren, ikut-ikitnam lau kalu-kolu. E jumpam tuhu ras anak Tarigan mergana, raja Pustima, Datuk Rumbiya gande, perpeken-peken salah ukum, perbelo tandang sinuwan.

“Enda sendah reh jukut mbelin man pangan. Dekah ku timai, menci pe la nggo nggarang arah teruhku, kuliki pe la nggo kabang arah bobo ku” nina.
“Aku pe, i pan nge aku nateku nini, i suruh kempundu aku ndai ku jenda, kempundu siberu Tiyang Manik, ngiyan-ngiyani kayu tanggolan. I ban ras kami je enggo empat berngi, enggo matah nakan man pangan, enggom kurang pola man inemen, la nai lit uwis man baban, la nai lit gulen man pangan.” Nina anak raja sahaluren Tuding si nu Purba.

“E di bage kin kepe, sukati jena beras, baba sada tuldak. La nai me matah nakan pangan, la nai me kurang gulen pangan, la nai me kurang pola inemen, la nai me kurang uwis man baban” nina nini.

E lawes me anak raja sahaluren Tuding si nu Purba, jumpa ras anak raja taneh Sahaluren si diberu, ma iya si tandan. “Ah kujang kem enda bibi?” nina anak sidilaki. “ndahi nini, mesuwi akap nande i rumah, mindo tambar ateku man nini, nini Datuk Rumbiya Gande, erpeken-peken salah ukum, erbelo tandang sinuwan.” Nina anak diberu.

“kutera i akap nandeta persuwina i rumah bibi?” nina si dilaki
“Ngalah dagingna e kerina, mama!, i perkuanken la nai beluh ngaloi” nina si diberu.

E i tabasina ageng bangkar. “enggo, semburi ku ringring nandeta, enggo me kari akapna malem bibi” nina si dilaki.

Bersambung
Bagian 4

Share on Google Plus

About Kalak Karo

This is a short description in the author block about the author. You edit it by entering text in the "Biographical Info" field in the user admin panel.