CERITA RAKYAT KARO " SI LAGA MAN "
BAGIAN - 6
“Enggo melus kuning pengulunta, sendah kita erdalin kempak
matawari ben”, nina Pengulu Dagang i tama si Laga Man. Lawes iya, e maka enggo
iya jumpa, idahna nahe si Laga Man, nahena kenca, i tamburi kabeng si
Gurdi-Gurdi.
Maka i rintakna embus-embus perpanden, embusina igungna, e maka
mulihi ka nggeluh, enggo mate manuk ndai.
Ercakap si Laga Man ras Pengulu Dagang. Lawes iya ku kubun diberu
si empat kalak, arih-arih iya kerina. “Sada e ngenca gelgel ngkeriken jelma?”
nina si Laga Man nungkuni. “Uwe mama”, nina diberu. “La nai kita mbiyar erdalin
ibas kesain”. Lawes iya erdalin-dalin, i siyar-siyar kerina rumah, barang si
meherga i pepulungna kerina.
Ben me. Nina si Laga Man, “La nai lit jelma ibas kesain enda,
ngena atendu, bangku kam”. “Ngena”, nina Diberu. E maka i empowina. Sada man
Pengulu Dagang, sada man si Laga Man, sada man si Pengeltep, sada man si Buluh
Sungsang. Maka i salihken si Laga Man, anak beruna si Buluh Sungsang, si
Pengeltep jadi anak beru si Pengulu Dagang. Maka lawes pengulu ras anak beruna.
Erdalin iya. Enggo seh i dagang, “Maidah kam tuhu nge kuning si melus ndube,
menam mate Pengulunta”, nina tare ginemgemna. “Enggo dat kami pengulunta, labo
mate, i embus kami igungna alu embus-embus perpanden, lang kin mate.”
“Di la kin mate, mehuli me, enggo giya melus bulung kuning ndube. Ateku
kin enggo mate ku idah melawen kam reh” nina ginemgem.
“Melawen kami reh, ercakap-cakap kami”.
“Kai cakap kena?’ nina. “Cakap empo”, nina. “Ise man banta?” nina.
“Endam kap, enggo baba kami duwa, ijah tading duwa man si Laga Man ras si Buluh
Sungsang. Man banta kute sada”.
“Mehuli me!”
-= Tamat =-
0 komentar:
Posting Komentar