CERITA RAKYAT KARO "SARINDU TUBUH"
BAGIAN - 4
Lawes me ku rumah si Beru Dayang Minta Raja, nina “bibi, enda
kampil anakndu” nina, “pisona ras bulangna, gonjena ras bentingna”. “ija si
raja Perkulcapi, dayang?” nina Sarindu Tubuh. “Anakndu enggo erlajar bibi, nina
si Beru Dayang. “ndigan iya reh kujenda dayang/” nina Sarindu Tubuh. “Ngerabi
kita lebe bibi” nina Si beru Dayang. “Enggom dung juma i rabi beru!” nina
Sarindu Tubuh. “Di enggo i rabi, i tabahi,” nina Beru Dayang. “Di enggo tabah i
erdah” nina si Beru Dayang. “Di enggo i erdah, i suluh” nina, “di enggo i
suluh, i angkut” nina, “di enggo i angkut, i lingke,” nina, “di enggo i lingke,
i erdangi” nina si Beru dayang.
“enggo ni enda dung juma erdangen beru” nina bibina. “suwan
suwan-suwanen, i suwan galuh, i suwan tebu, i suwan belo, i suwan mayang, i
suwan bunga-bunga, i suwan rimo. Enggo cukup suwan-suwanen beru” nina bibina,
“metuwa me page, erbuah me galuh, kadegang tebu, erbunga bunga-bunga, erbunga
mayang, erbulung belo, erbuwah rimo” nina. “di enggo bage bibi, i tutu cimpa, i
petasak galuh, i peres tebu, i nagkih mayang, i nagkih rimo, i nagkih belo, i
buwat bunga-bunga.” , “enggo me pulung kerina beru!” nina bibina. “i kanting
gantang mbaru ku lau bibi” nina si Beru Dayang kata bibina.
“enggo me enda kita re hi lo nari, Dayanng, katawari reh si raja
Perkulcapi?” nina bibina. “Enta lebe ku tenahken kucing ras tempulak” nina si
Dayang. “aku perlandekna” nina kucing ras tempulak. “aku malu gendang” nina
katak. “aku narune” nina gaya. “aku malu penganak” nina ampuk. “aku malu gung”
nina tuntung kerangen. “aku ndai ndewalkenca” nina pune. “aku guruna” nina
kuliki.
Erkulik-kulik kuliki si mangki-angki. Tangis tersembep kuliki si
mangki-angki. “enda me kap anakndu ndube bibi” nina si beru Dayang kata bibina.
“enggo kepe mate si raja Perkulcapi, Dayang” nina bibina, “e ku bunuh engko
maka ateku malam” nina bibina. “aku pe mate nge aku nateku bibi” nina si Beru
Dayang. “enda tenahku ermanat-manat, padanta enda ermake”
“Di lit pagi danak-danak niesengget, i giling-gilingken taneh
sipuluh kali, i ampeken ku kalimbubuna, i sebut nini beraspati taneh. Sai me
utang, ganci ido, sai mara, ku rumah tendi”.
“Beliden sitik pagi burawanna, bibi, i kicik-kicikken beras
sigantang, belo cawir ras baja minak, bunga-bunga sintangke, i oge pada-padina,
sai mara tan si kawes, ku rumah tendi arah kernukun, i dewal-dewalken guru si
baso, sai utangna, ganci idona, sai marana, ku rumah tendina. Gamber timbako
silekanna ras guruna.”
“Beliden pagi sitik burawanna, rembu mbuwen tiga rupa, recibal
rudang, ampar ampar gana tonggal pagi, buwaten ertukuk-tukuk,
ertangkal-tangkal, eramanuk piyak-piyak, ertambe-tambe, beras situmba pukulen
guruna, sira siicupak persilekrina, sai me utangna, ganci me idona, sai marana,
ku rumah tendina.”
“beliden sitik pagi burawanna em mbu-mbun sangkep erpulung,
persilih-silihi cur-cur, pola binerkat, galih binerkat, siyang-siyang si
ruungkas, siyang tungkas banga kelesa Si pukulen guruna telu tumba beras, nina,
sira si gantang persilekanua, sai utangna, ganci idona, sai marana, ku rumah
tendi.
“beliden sitik pagi burawan, erpantar pantar, ranjap-anjap, erbertuk
empat, erlambe sarsar, nasarken banga kelesa, ermanuk mbulan, ertualah mumbang,
ercimpa rambe-rambe, ergule-gulen, gana duwa, pagi buwaten ercibal rudang
mehalep, ertukuk-tukuk, ertambe-tambe, ermanuk piyak, ertangkal,
persilih-silihi cur-cur, pola binerkat, galuh binerkat, beski tinampol silando
ngawan, siyang siyang sirungkas, tungkas nipi sambar, tungkas banga kelesa, i
cukupi, peraleng tendi ku rumah, nini begu deleng, i ogena mayan tandan-tandanen,
i ogena tuwalh mumbang surega, i ogena cimpa lepat-lepaten, i ogena tinaruh
manuk raja muliya, ikan i kelajar naring, sira i kerijah nari, i lajari tendi
si enggo burawan, meriyah ate tendi ni rumah. Si matana kurungen manic, gelarna
terus sikat i lajari tendi enggo burwan, pekurung-kurung tendi rumah, terus
mejingkat siding sisin, kampilna kampil sinendi, belona susun-susunen, ersusun
tendi ku rumah,taganna lagan kinukut, kalakatina penjabat, kapurna meciho,
meciho perlaban perulihen, ijabat, i kukut tendi di mehuli i rumah. Sai me
utang, ganci ido. Silekanna situmba sira, pukulen guruna lima tumba beras, amak
silambar, dagangen sada, utangna empat emas, sulpat me banga kelesa, sulpat
nipi sambar, sulpat singalah daging, sulpat si rance kula, sulpat si badat
niata, sulpat si ngerepat nahe, sulpat si ngalungan babah. Sai me utang, ganci
ido, sai mara, ku rumah tendi.”
Bersambung
Bagian 5
0 komentar:
Posting Komentar