CERITA RAKYAT KARO " SI LAGA MAN "
BAGIAN - 4
Maka jumpa iya ras si Pengerintak Buluh Sungsang. “Kuja nge
niyar-niyar”, nina si Buluh Sungsang.
“La larangen jelma ibas kerangen Limbu raja” nina si Laga Man.
“Kai maka lang nindu?” nina si Buluh Sungsang.
“Ma lit si ngateken bage enggo dekahku siyar-siyar ibas kerangen
Limbu raja” nina si Laga Man.
“Aku pe mbelin-mbelin ibas tengah kerangen enda!” nina Si Buluh
Sungsang, “ma lit jelma, di jumpa bage cakapna!”.
“Radu jumpam kita sendah, di la kam mate, aku mate, sendah kam
meriyah me!” nina si Laga Man.
Maka i rintak Buluh Sungsang buluh mbur, i cabutna, enggo meruwah
ras taneh, ras uratna. E maka i tutukenna si Laga Man, nuruk si Laga Man arah
teruh.
E maka i tipak si Laga Man, minter kicat si Buluh Sungsang. Maka tangis
si Buluh Sungsang.
“Enam katangku ndai mena kita arih-arih, mintes kam merawa,” nina
si Laga Man.
“Di bage, nembah aku, tangtangi naheku e”, nina si Buluh Sungsang.
I tangtangi si Pengeltap si Buluh Sungsang, “Ent adage piso e”,
nina si Buluh Sungsang. E maka i bereken si Laga Man. I takilna buluh ndai maka
meluwah nahena.
Maka i bereken si Laga Man ngisap si Buluh Sungsang. Ngisap iya
teluna. Enggo ras ngisap, arih-arih iya.
“Janari kam!” nina si Buluh Sungsang.
“Aku erdalin-dalin, ma pet nandeku, turangku kerina, puwas
ngenehen aku, e maka aku erdalin-dalin”, nina si Laga Man. “si kai dage
gelarndu e teman” nina si Bulung Sungsang. “Gelarku si Laga Man”, “teman ndu e,
senina kam duwana”, “Lahang” , “e dage, si kai gelarna?” “Si Pengeltep Begu”, “Ola
nai kita rubat teluna” nina si Buluh Sungsang, “Kam bapa kami duwana”, e maka
la nai rubat iya.
Lawes ka iya erdalin-dalin, i lawesina pitu lapis deleng. Ngadi ka
iya ngisap. Lit sada deleng nari. Seh iya idas, i tatapna ku berneh. Idahna kuta
sada, nusur iya kuje. Ndahi jelma ije, perdagang lada. E maka ku sapo iya, i
datna i sapo pengulu dagang. I berekenna ngisap. I bereken pengulu ngisap ka.
“aku kuteruh ntisik”, nina Pengulu. Nusur iya kuteruh, siyar-siyar
ginemgemna kerina lima puluh kalak, i katakenna pulung. E maka arih-arih kerina
ije, “lit jelma telu kalak ku sapoku dagangta enda, ma kalak e pang kubas
sapoku, mbiar kalak” nina Pengulu Dagang.
“Si bunuh gelah, si pan” nina ginemgem. “Bage” nina Pengulu. E maka
nggarut pisona iya kerina
Lawes iya ku sapo. Maka se hiya kerina, nina Pengulu “ Kuteruhlah
kam teluna e silih, gelah ngisap kita”. “Banci” nina si Laga Man.
Idah si Laga Man enggo mbentar kerina piso. Maka i buwat si Laga
Man sempukul cimpa ras bunga-bunga selembar, maka i cidurina, i putarina
temanna ras iya.
Nusur iya, i berekenna pengulu ngisap, mintes i takil ginemgem
kerina ras Pengulu, pagi-pagi matawari asa ciger, lalap ma mate, sabap ma
telap. Enggo latih Pengulu, kiyam. I bunuh si Laga Man Pengulu Dagang.
“O teman kerina, enggo puwas ate kena nakili kami, pagi-pagi nari
asa ben matawari. Labo kena i bunuh kami, maka nggit kam munuh kami teluna,
perbahan kata Pengulu Dagang. Kena labo i bunuh kami, ola kam mbiyar” nina si
Laga Man.
“Nembah kami kerina, ola kami i bunuh” nina Ginemggem. “Lahang”
nina si Laga Man.
E maka i berekenna kampilna man si Laga Man ras temanna. I alokenna,
ngisap. Ginemgem deba muwat tebu, kulitina, i berekenna. I pan si Laga Man ras
temanna. Enggo mengus tebu, “Kudah kita”, nina si Laga Man.
Erdakan perdagang, i geleh manuk. Enggo tasak kerina, dilona si
Laga Man ras temanna man kerina ras, lima puluh duwa, minter medem.
Bersambung
Bagian 5
0 komentar:
Posting Komentar